أزاي تاخد أصعب 3 فيز بسهولة

الموضوع ببساطة أن اللي قدامك شايفك عاوز تهرب فأنت عليك تثبتله أنك مش هتهرب بطريقة بره الصندوق وبكل صدق من غير ما تكدب وأنك تفكربنفس تفكيره (ده بيفكر بالصيني)وأوعي تستهون في كل مره تقدم علي فيزا ,علشان ممكن يكون معاك فيزا الدنيا وتترفض علشان هو حس أن ظروفك دلؤتي مش أحسن حاجة وممكن تخلع.

1-فيزا أمريكا:

ممكن نقول 80%


من موافقة الفيزا علي الأبلكيشن و 20% أنترفيو

علشان كده خد وقتك في ملئ الأبلكيشن وأوعي تكدب في حاجة علشان هيقفشوك..والأنترفيو بيشوفك بيحور في الكلام اللي كتبته ولا لأ

لو رايح سياحة طبعا مش أول ما تشطح تنطح وتكون أمريكا أول سفرية فلازم يكون عندك رصيد حلو من السفريات..فتعملهم برنامج حلو كل يوم هتعمل أيه هناك بالأماكن والمواصلات..ولو رايح مؤتمر أوتدريب لازم تثبتلة انك حضرت قبل كده حاجات زي كده وانك مش جديد في الموضوع ده وتشرحلة رايح تعمل أيه بالظبط وهيعود عليك بأيه.

2- فيزا أنجلترا

أهم حاجة في الفيزا ديه أنك يكون عندك حساب بنكي يغطي فترة إقامتك هناك وكمان هيكلموك في الشغل ويستفسروا عنك.

أنا بعد ما ممليت الأبلكيشن وحددت ميعاد ..خدت معايا حساب بنكي يكون عليه ايداع وسحب وكمان خطاب عمل وبعد كام يوم اتكلموا في الشغل وسألوا عليا.

أهم حاجة في الفيزا ديه يكون عندك شغل مستقر وفلوس تغطي فترة إقامتك.

3-فيزا شنجن

ديه فيزا ورق..يعني لازم تجيب كل الورق المطلوب منك ولو ورقة ناقصة هتاخد الرفض المتين.

وزود عليه ودعم موقفك بانك تحط البرنامج بتاعك بالتفصيل وهتعمل ايه بالظبط.. وحاول تجيب دعوة من كيان أو منظمة في منطقة الشنجن هتدعم موقفك (وليست دعوة من شخص علشان ديه معناها أنك دافعلة فلوس وهتهرب) وتكون المنظمة هتتكفل بكل مصاريفك وإقامتك..ولو متعرفش منظمة يبقي لازم يكون عندك رصيد سفريات كويس وتقدم برنامج كل يوم هتعمل ايه , وليه رايح الدول ديه بالذات يعني اللي بتفكر فيه فرغة علي ورق وادهلهم.

أنا كنت رايح شغل تصوير في ألمانيا وكان لازم أسافر كذا مره فعملت برنامج محترم بالمواعيد والأماكن اللي هصور فيها ومع مين.

طبعا في حاجات أستثنائية للقبول والرفض بس أهم حاجة تحاول تقنع اللي قدامك أنك مش هتهرب بطريقة تفكير بره الصندوق.

عن

%d مدونون معجبون بهذه: